1 Raja-raja 22

Rapa’ bangmi tu tau iato mai lan tallung taun, tae’ tananan ra’ lan alla’na to Aram na to Israel.

Apa iatonna taun ma’pentallun, iatu Yosafat, datu Yehuda male lako umpessitiroi datu to Israel.

Ma’kadami tu datu to Israel lako mintu’ to mase’ponna, nakua: Miissan siaraka, kumua iatu Ramot dio Gilead naala lili’ta? Anta popa’elo’na bangi tang unnalai sule lan mai kuasanna datu to Aram!

Nalako Yosafat nakua ma’kada: Morairokomika tamale sola urrarii Ramot dio Gilead? Mebalimi tu Yosafat lako datu Israel, nakua: Umba mipasusi susi dukana’ to, iatu bangsami susi dukato tu bangsaku na iatu mai darangmi susi dukato tu darangku.

Apa nakuapa tu datu Yosafat lako datu to Israel: Pekutananni dolo umba nakua tu kadanNa PUANG.

Napasipulungmi datu to Israel tu mai nabi, agi-agi a’pa’ ratu’ tau, anna mekutana lako tau iato mai, nakua: La laoraka kurarii tu Ramot dio Gilead, da’i bangmiraka to? Mebalimi tu tau iato mai nakua: Laomokomi, belanna la Nasorong PUANG tu kota iato tama limanna datu.

Apa nakua tu Yosafat: Tae’moraka misa’ nabinNa PUANG inde te? Melo ke takutanai tu apa la tapogau’.

Nakuami tu datu to Israel lako Yosafat: Den siapa misa’ tau, tu tapotete ma’din mekutana lako PUANG, apa kukabiri’, belanna tae’ bang maelona tu napokada diona kaleku, sangadinna kadakena manna, iamo tu Mikha anakna Yimla. Nakuami Yosafat. Da nama’kada susito tu datu.

Natambaimi datu Israel tu misa’ to mase’ponna anna ma’kada nakua: Alai madoi’ tu Mikha anakna Yimla.

Pada unnisungmi dao isungan kapayunganna tu datu to Israel na Yosafat, datu to Yehuda, umpake pakean kamala’biranna dio rante panglulluran dio salian babangan Samaria, tonna marassan tu mintu’ nabi ma’nubua’ dio olona.

Iatu Zedekia, anakna Kenaana, mangkamo unggaragan kalena tanduk bassi, anna ma’kada nakua: Inde sia tu kadanNa PUANG: Tete dio te apa iate la miserokanni tu Aram sae lako misabu’ina nasang tu tau iato mai.

Susi dukato tu mintu’ nabi ma’nubua’ nakua: Melo ke ke’de’komi lako Ramot, lili’na Gilead, sia la maupa’komi, belanna la Nasorong PUANG tu kota iato tama limanna datu.

Iatu to disua untambai Mikha nakua lako: Iatu kadanna mintu’ nabi, misa’ri sia melo tu napokada lako datu; iatu kadammi la susi duka kadanna simisa’-misa’ tua iato sia ma’kada melokomi.

Apa mebali tu Mikha nakua: La lelukraka tuoNa PUANG, manassa apa tu Napokada PUANG lako kaleku, ia dukamoto tu la kupokada.

Iatonna saemo lako datu, ma’kadami tu datu lako nakua: E Mikha ma’dinrakannika lao urrarii Ramot, lili’na Gilead, ba’tu da’i bangmiraka to? Mebalimi nakua: Ke’de’mokomi, manassa la maupa’komi, belanna la Nasorong PUANG tama limanna datu.

Apa ma’kada tu datu lako nakua: Pempiran bangra’ la umpopassumpakomi, kumua da mipokadai lako kaleku, ke tae’i natonganna tete dio sanganNa PUANG?

Nakuami tu Mikha: Kutiromo tu mintu’ to Israel sisarak-sarak dao lu tanete butung to domba tae’ to mangkambi’na; anna ma’kada tu PUANG, nakua: Iate mai tau tae’mo puangna, da’ito anna pantan sule marampa’ lako banuanna.

Ma’kadami tu datu to Israel lako Yosafat nakua: Tang kukuaraka mati’, kumua tae’ napa’nubuaranna’ tu apa melo, sangadinna kadakena manna?

Nakuami Mikha: Iamoto perangii tu kadanNa PUANG: Kutiromo tu PUANG unnisung dao isungan kapayunganNa namintu’ baananna suruga bendan dio kanan kairinNa.

Ma’kadami tu PUANG Nakua: Mindara tu unnaran Ahab, naurunganni ke’de’ male sia la mate dio Ramot, lili’na Gilead? Misa’ ma’kada susite, misa’ ma’kada susito.

Saemi tu misa’ penaa mennolo sia bendan dio oloNa PUANG anna ma’kada nakua: Aku la unnaranni. Ma’kadami PUANG lako Nakua: Umba la mupakuanni?

Mebalimi nakua: La malena’, angku mempenaa bulituk lan pudukna mintu’ nabinna. Ma’kadami tu Puang Nakua: Manassa la munaran sia mubela umpogau’i to; malemoko, mupogau’i.

Na totemo manassa Napatamamo PUANG pudukna mintu’ nabimmi tu misa’ penaa bulituk, sia Nara’ta’mo PUANG tu misa’ kamandasan lako kalemi.

Saemi tu Zedekia, anakna Kenaana, ussala’pai tu pili’na Mikha sia nakua: Umba nakuan tu PenaanNa PUANG la lele dio mai kaleku, anna ma’kada lako kalemu?

Apa ma’kada tu Mikha nakua: Manassa la mutiro sia tu allona, tu la munii mallai membuni dio bilik misa’ lako bilik senga’.

Ma’kadami tu datu to Israel nakua: Alai tu Mikha solanni sule mubaai lako Amon, pangulunna kota sia lako Yoas, anakna datu,

kuanni kumua nakua tu datu: Palanni pa’tarungkuan te tau iate sia ben bangi roti sia uai sidi’ sae lako sule marampa’ku tama tondok.

Nakuami tu Mikha: Iake sule marampa’komi, manassa tae’ PUANG ma’kada tete dio pudukku. Sia nakuapa: Perangii, e kamu mintu’ bangsa.

Mangkato ke’de’mi tu datu to Israel sola Yosafat, datu to Yehuda, la urrarii Ramot, lili’na Gilead.

Ma’kadami tu datu to Israel lako Yosafat, nakua: La umbalilina’ kaleku tama kasirarian; apa pake bangmi kamu tu pakean kamala’birammi. Umbalilimi kalena tu datu to Israel, anna tama kasirarian.

Iatu datu Aram, mangkamo umpa’parentanni lako kamandang karetana tallungpulo ndua tau, nakua: Da misirari tu mai to bitti’ ba’tu to kapua, sangadinna ia manna tu datu to Israel.

Iatonna tiromi mintu’ kamandang kareta tu Yosafat, metambami tu tau iato mai, nakua: Manassa iamo datu to Israel tu; tibalikmi lako kalena la ullaoi; apa unnarrak-arrak tu Yosafat.

Iatonna tiromi mintu’ kamandang kareta, kumua tangia datu to Israel, tibalikmi dio mai kalena.

Apa den misa’ tau tu tae’ naangga’i ma’pana, anna ruai tu datu to Israel dio to’ pa’pasitammuan bayu kararran. Nakuami lako tu to untoe ulang darang karetana: Bintii sule tu ulang, ammu solanna’ sun lan mai to’ surodadu, belanna bangkemo’.

Apa samasarrang-sarrangna tu rari allo iato sia bendan bang tu datu lan karetana sitingoan to Aram. Apa iatonna makaroenmo matemi sia lolong tu rarana lan mai bangkena rokko sali kareta.

Iatonna la lambunmo allo, denmi tau metamba umpekapuai gamaranna anna silelean lan to’ surodadu, nakua: Melo ke pantan sulei tu tau lako kotana sia lako tondokna.

Susimoto tu kamateanna datu anna baai tau lako Samaria sia nalamun tau iato mai dio Samaria.

Iatonna basei tau tu kareta dio limbong dio Samaria, nalepa’imi asu tu rarana, tonna marassan tu baine bualang mendio’ susitu kadanNa PUANG tu mangka Napokada.

Iatu tang dipokadannapa tu mintu’ tuna’na Ahab sia mintu’ tu apa mangka napogau’ sia iatu tongkonan layuk gading tu mangka napabendan sia mintu’ kota mangka nabangun, tang tisura’moraka lan sura’ ossoranna mintu’ datu to Israel?

Mangkato malemi tama batu dilobang tu Ahab sola nene’ to dolona, na Ahazia, anakna muane ussondai dadi datu.

Iatu Yosafat, anakna Asa, dadi datu to Yehuda, tonna taun ma’penna’pa’na Ahab umparenta to Israel.

Iatonna dadi datu tu Yosafat tallungpulo llima taunna, anna ma’parenta duangpulo llima taunna dio Yerusalem. Iatu indo’na disanga Azuba, anakna Silhi.

Urrundu’mi bate lalanna Asa, ambe’na, tae’ len nasepang dio mai sia napogau’ tu apa malolo dio pentiroNa PUANG. (22-44) Ia manna tu inan madao tae’ naputtai, sangadinna tontong siapa mantunu sia memala’ tu to buda dao inan madao.

(22-45) Sia iatu datu Yosafat sikarampa’ bang datu to Israel.

(22-46) Iatu tang dipokadannapa tu mintu’ tuna’na Yosafat sia iatu penggauran lalongna tu mangka napogau’ sia mintu’ tu rari napogau’, tang tisura’moraka lan sura’ ossoranna mintu’ datu to Yehuda?

(22-47) Sia naputtai lan mai tondok tu mintu’ to ma’gau’ sala dio to’ dipa’deatainna, tu torronapa tonna linona Asa, ambe’na.

(22-48) Iatonna attu iato tae’ datu dio Edom, anna to maraa tu bendan butung datu.

(22-49) Nagaragami Yosafat tu kappala’ susi kappala’ Tarsis la lao unnala bulaan dio mai Ofir. Apa tae’ anna landa’ massombaran, belanna malammu’ tu mintu’ kappala’ iato dio Ezion-Geber.

(22-50) Iatonna attu iato, ma’kadami tu Ahazia, anakna Ahab, lako Yosafat, nakua: Melo ke malei tu taungku sola taummi massombaran. Apa manoka tu Yosafat.

(22-51) Mangkato malemi tama batu dilobang tu Yosafat sola nene’ to dolona, anna dipeliang sola nene’ to dolona, lan kotana Daud, ambe’na, na Yoram anakna muane, ussondai dadi datu.

(22-52) Iatu Ahazia, anakna Ahab dadi datu umparenta to Israel dio Samaria, tonna ma’sangpulo pitumo taunna tu Yosafat umparenta to Yehuda, anna duang taun umparenta to Israel.

(22-53) Sia napogau’ tu apa kadake dio pentiroNa PUANG sia lolang unturu’ bate lalanna ambe’na sia bate lalanna indo’na sia bate lalanna Yerobeam, anakna Nebat, tu ussua to Israel, umpogau’ kasalan.

(22-54) Sia mengkaola lako Baal sia tukku menomba dio olona, tu umpa’dikki penaanNa PUANG, Kapenombanna to Israel, susitu mintu’ napogau’na ambe’na.